Əziz keçmiş, indiki və gələcək oxucu dostlarım, salam!
Neçə illərdir ki, mən həm də ədəbiyyat dilində danışıram. Həmişə çalışmışam aydın, sadə və təsir edə biləcək dildə yazım. Başa düşülməkdən, sözümün canını deməkdən çəkinməmişəm. İstəmişəm ki, Əjdər Olum. Sərrast və sərbəst, saf və duru düşüncəli adamlarla bir yerdə olanda darıxmıram. İçərisində azacıq işıq közərən, sevgi qaynayan insanlarla asanlıqla dil tapıram. Mənə elə gəlir ki, söhbətimiz tutacaq. Son iyirmi-iyirmi beş ildə can yandırıb yazdıqlarımı qısa bir zamanda oxuya bilərsiniz.

Dərin Hörmətlə, Əjdər Ol

Əjdər Ol (Cəbiyev Əjdər Feyzulla oğlu) 1958-ci il avqustun 17-də Azərbaycan Respublikasının Qazıməmməd şəhərində anadan olmuşdur. Burada 5 saylı orta məktəbi bitirdikdən sonra Zərdabi adına Gəncə Dövlət Pedaqoji İnstitutunun Azərbaycan dili və ədəbiyyatı fakültəsində təhsil almışdır. (1975-1979) Daha sonra hüquqşünas, iqtisadçı ali təhsillərinə yiyələnmişdir. Əmək fəaliyyətinə müəllim kimi başlamışdır. (1979-1985), “İşıq” nəşriyyatında korrektor, kiçik redaktor (1986-1988), Yazıçıların Yaradıcılıq Evində direktor müavini (1988-1990), Bədii Ədəbiyyatın Təbliği Bürosunda direktor müavini (1990-1992), Azərbaycan Respublikasının Prezidenti Aparatının Milli siyasət şöbəsində məsləhətçi (1992-1994), “Şur” nəşriyyatında Baş redaktor (1994), Azərbaycan Respublikasının Maliyyə Nazirliyində Mətbuat xidməti və protokol bölməsinin rəisi (1994-2002), Azərbaycan Respublikası Dövlət Sosial Müdafiə Fondunun Aparatının rəhbəri (2002-2013), Azərbaycan Respublikasının Əmək və Əhalinin Sosial Müdafiəsi Nazirliyinin Aparatının rəhbəri (2013-2018) vəzifələrində çalışmışdır. 2007-ci ildə Respublika Prezidentinin sərəncamı ilə “Dövlət qulluğunda fərqlənməyə görə” medalı ilə təltif edilmişdir. Bədii yaradıcılığa keçən əsrin 80-ci illərindən başlamışdır. “Dünənim də belə keçdi”, “Necə sevməyəsən?!” adlı ilk şeirləri “Azərbaycan” jurnalında (1981, N 9) çap ediləndən sonra ölkə daxilində, xaricdə almanax, jurnal və qəzet səhifələrində orijinal və məzmunlu, bədii dəyərli poetik, publisistik, nəsr və dram əsərləri ilə müntəzəm çıxış edir. “Molla Nəsrəddin və Əmir Teymurun filləri” komediyası 2005-ci ildə Dövlət Gənclər Teatrında, “Son məktub” pyesi 2007-ci ildə Dövlət Milli Akademik Dram Teatrında, “Kimyagər” pyesi 2012-ci ildə Dövlət Akademik Musiqili Teatrda, “Biri vardı, biri yox…” pyesi isə 2015-ci ildə Dövlət Gənc Tamaşaçılar Teatrında tamaşaya qoyulmuşdur. Tamaşalara əməkdar incəsənət xadimi, rejissor Bəhram Osmanov quruluş vermişdir....

 Davamı...